Umaboten iti sangapulo ket siam ti natay ken duapulo ket maysa ti mapukpukaw gapu iti nakaro nga epekto ti Bagyo Bualoi, dati a Bagyo Opong, idiay Vietnam.
Maibilang ti Bagyo Bualoi a kapigsaan a bagyo a nangapektar iti pagilian ita a tawen, gapu iti napigsa a tudo a nakaigapuan ti layus ken panagreggaay ti daga iti amianan a paset ti Vietnam.
Segun iti gobierno ti Vietnam, nadunor iti walopulo ket walo nga indibidual, nasurok-kumurang a 100,000 a pagtaengan ti nagsagaba iti minor damage, ken mapatta-patta a 10,000 nga ektarya a talon ti nailumlom pay laeng iti layus.
Kinuna ti Vietnam Weather Agency a nangatngato ngem 300mm ti lebel ti danum iti sumagmamano a paset ti pagilian, ken nagballaag ti napigsa a tudo, napigsa nga angin, ken kimat gapu iti saan a nasayaat a paniempo.
Iti agdama, adda pay laeng ti layus iti amianan a paset ti pagilian rason a nakaserra dagiti dadduma a kalsada ken awan pay ti suplay ti koriente iti nasao a lugar. Augie Arellano
