VIGAN CITY – Ibilang ni Ilocos Sur Comission on Elections Officer Atty. Alipio Castillo III a “human error” ken saan a “technical error” dagiti napasamak idi kalman kalpasan nga adda dagiti dadduma a botante a sabali ti rimuar iti resibo ti nagan ti kandidato manipud iti binotosanda.
Iti pannaki-uman ti Bombo Radyo Vigan ken ni Castillo, iti mano a bulan a nagsagana ti Comelec ket saanda pulos a napadas ti nasao nga insidente.
Aminado nga adda dagiti technical problem a napasaran idi kalman, aldaw ti eleksyon kas ti saan a panangawat ti vote counting machine kadagiti balot, panag-overheat ti VCM ken dadduma pay ngem impasiguradona nga adda nakasagana a contingency plan ti Comelec tapno marisut dagiti parikut.
Uray nataktak iti mano a minutos ti proseso ti panagbotos, narisut met laeng babaen kadagiti mangisursuro ken election officer.
Impannakkel ti opisial nga iti maysa laeng nga aldaw ket naparuar ti resulta ti eleksyon malaksid laeng iti ili ti Sinait a mayur-uray pay laeng iti resultana.
