VIGAN CITY – Maysa ti natay iti napasamak a panagdinnungpar ti motorsiklo ken van iti national highway iti Barangay Magsaysay, Sinait, Ilocos Sur.
Nabigbig ti natay a drayber ti motorsiklo a ni Mark Nleson Tulay Inong, agtawen iti sangapulo ket walo, taga-Barangay Sallacapo, Sinait.
Ti met nagmaneho iti White Hi-ace van ket ni Rica Mae Quilala Rodriguez, agtawen iti duapulo, taga-Barangay Darao, San Juan.
Iti pannaki-uman ti Bombo Radyo Vigan ken ni Police Captain Bryan Lopez, agpapa-abagatan ti van idin ta immagaw ti linya ti motorsiklo ket nagdinnungparda.
Gapu dayta, nagsagaba iti nakaro a dunor iti tyan ti drayber ti motorsiklo a naipaagas iti Sinait District Hospital para iti pannakatamingna ngem naideklarar a dead on arrival.
Natakuatan nga awan ti suot a helmet ti nagmotorsiklo ken nakainom idi mapasamak ti insidente ta adda pay bote ti arak a naisukibot iti bakrangna.
Saan met a naan-ano ti drayber ken dagiti inlugan ti van ngem dagiti dua a lugan ket agpada nga adda dadaelna.
Ti met drayber ti van ket addan iti kustodua ti Sinait Police Station para iti idadalanna iti husto a proseso.
