Naipaagas iti ospital dagiti pito a karaman iti panagdinnungpar ti traysikel ken motorsiklo iti provincial road idiay Barangay Ambugat, Burgos, Ilocos Sur.
Ti Honda XRM a motorsiklo ket minaneho ni Sonny Arreola Dagdag, agtawen iti limapulo ket innem, kapitan ti barangay, taga-Barangay Manaboc, Burgos.
Ti met traysikel ket minaneho ni Chester Bermudes Gadiano, agtawen iti tallopulo ket walo, inluganna dagiti ubbing nga agtawen iti pito ken dua nga agtawen iti tallo agraman ti senior citizen a ni Honorata Bobiles Directo, agtawen iti pitopulo ket pito, agpapada a taga-Barangay Dayanki, Burgos.
Agpapa-abagatan ti motorsiklo idinto nga adda iti bangir a linya ti traysikel, ket idi magtengda ti nakapasamakan ti aksidente, immagaw ti motorsiklo iti linya ti traysikel isu a nagdinnungparda.
Nadunor dagiti amin a karaman isu a naipaagasda iti ospital para iti naan-anay a pannakatamingda.
