Nadunor iti nadumaduma a paset ti bagi ti maysa a drayber gapu iti panagdinnungpar ti minanehona a motorsiklo ken ti van idiay Barangay Ayudante, Candon City, Ilocos Sur a nakairamanan ti dua a lugan.
Ti Black Yamaha NMAX a motorsiklo ket minaneho ni Carlos Elosa Uclaray, agtawen iti limapulo ket siam, Barangay Kagwad, taga-Panay Norte, Magsingal, nakasuot iti helmet.
Ti met Nissan Urvan ket minaneho ni Fernando Casas Estayo, agtawen iti limapulo ket siam, retirado a Philippine Army, taga-137 Salcedo Street, Vigan City, inluganna da Grace Estayo Rabino, agtawen iti uppat a pulo ket walo, caretaker, taga-Barangay 7, Vigan City.
Agpapalaud ti motorsiklo ket idi madanonna ti nakapasamakan ti insidente, simrek iti national highway ket inagawna ti linya ti agpapa-amianan a van isu a nagdinnungparda.
Naipaagas iti ospital ti drayber ti motorsiklo gapu iti sinagabana a dunor idinto a ti drayber ti van ken dagiti pasaherona ket saan a naan-ano.
