VIGAN CITY – Dead on arrival ni Louie Jay Purugganan, agtawen iti duapulo ket lima, delivery boy a taga-Brgy. Cabittaogan, Sta. Catalina gapu ti panagdinnungpar ti minanehona a motorsiklo iti traysikel idiay Brgy. Cabaroan iti nasao nga ili.
Ti traysikel ket minaneho ni Mon Briant Buenaflor, agtawen iti tallopulo ket innem a taga-Brgy Paratong, Sta. Catalina.
Agpapadaya a direksyon ti motorsiklo idin ta linisyanna ti masimsimpa a kalsada ket nagsikko met ti agpapalaud a traysikel a gapuanan ti dinnungpar.
Mapapati a napaspas ti panagpataray ti naka-motorsiklo isu a numan pay adda helmet-na ket nagsagaba iti nakaro a dunor gapu ti kapigsa ti impact ti aksidente.
Kabayatanna, adda met dunor ti nagmaneho iti traysikel nga agpapalaing itan iti ospital idinto a dagiti dua a putotna nga agtawen iti lima ken sangapulo ket maysa a nakalugan ket saan a nadangran.
