VIGAN CITY – Maysa ti nadunor iti napasamak nga aksidente idiay Barangay Jardin, Tagudin a nakairamanan ti maysa a motorsiklo ken Isuzu Forward truck.
Nabigbig ti nagmaneho iti motorsiklo a ni Nelmar Labador Leal, agtawen iti duapulo ket innem, agnaed iti Barangay Bio, Tagudin.
Ti met nagmaneho iti ISUZU forward ket ni Dennis Manalo Sawale, agtawen iti uppat a pulo ket uppat, agnaed iti Bulakin, Tiaong, Quezon kaduana ti helper a ni Danny Paicon, agtawen iti limapulo ket maysa, agnaed iti Barangay San Felix, Sto. Tomas, Batangas.
Segun iti witness a ni Rey-an Javier Acosta, agtawen iti duapulo ket maysa, agnaed iti Ranget, Tagudin, daldalyasaten dagiti dua a lugan ti agsinnumbangir a linya idin ta idi madanonda ti kurbada a paset ti barangay ket nag-overtake ti motorsiklo iti sarsarunwenna a lugan isu a nagdinnungparda ti nakasabetna a trak.
Gapu dayta, natukkol ti akin-kannigid a takyag ken nadunor ti nadumaduma a paset ti bagi ti drayber ti motorsiklo idinto a saan a naan-ano ti drayber ti trak.
Natakuatan a nakainom iti arak ti drayber ti motorsiklo idi napasamak ti aksidente.
