Maysa ti nadunor iti panagdinnungpar ti motorsiklo ken Toyota Wigo iti national highway ti Barangay San Jose, Candon City, Ilocos Sur.
Ti Toyota Wigo ket minaneho ni Cesar Cassillan Gacutan Jr., agtawen iti duapulo ket walo, outlet manager ti Pepsi, inluganna ti asawana a ni Euralyn Angel Gacutan, agtawen iti duapulo ket lima, taga-Barangay San Nicolas, Candon City.
Ti met motorsiklo a Yamaha Aerox ket minaneho ni Albert Gagto De Los Santos Jr., agtawen iti duapulo ket walo, taga-Barangay San Isidro, Candon City.
Iti pannaki-uman ti Bombo Radyo Vigan ken ni Police Captain Sunshine Lozano, Deputy Chief of Police ti Candon City Police Station, agpapa-abagatan ti Toyota Wigo idinto nga adda iti bangir a linya ti motorsiklo ket idi madanonda ti nakapasamakn ti insidente, nagsenyal nga agpakannigid ti Wigo a sumrek iti sangwanan ti Mercury drug store idinto a ti napaspas ti patarayna a motorsiklo ket saanna a nadlaw ti senyal ti Wigo isu a nagdinnungparda.
Gapu dayta, nadunor ti ulo ken nadumaduma a paset ti bagi ti drayber ti motorsiklo a naipaagas iti ospital para iti pannakatamingna idinto a saan a naan-ano ti drayber ti Toyota Wigo.
Agpada nga adda dadael dagiti dua a lugan ken natakuatan a nakainom ti nagmotorsiklo.
