VIGAN CITY – Dead on arrival ti maysa a lalaki gapu ti panagdinnungpar ti motorsiklo a minenahona ken ti maysa nga SUV idiay Barangay Suso, Sta. Maria.
Nabigbig ti nagmaneho ti puraw a Suzuki raider motorcycle a ni Mark Edward Degire, agtawen iti duapulo ket tallo, agnaed iti Brgy Suso iti nasao nga ili idinto a ti Ford Everest ket minaneho ni Ceasar Flores, agtawen iti uppat a pulo ket maysa kaduana ti pasaherona a ni Jeeboy Tejero, agtawen iti duapulo ket siam, agpada a taga-Brgy Poblacion, Tayum, Abra.
Iti pannakiuman ti Bombo Radyo Vigan ken ni Pcapt. Joel Dasargo iti Sta Maria Police Station, agpapadaya a direksyon ti nakamotorsiklo idin ta naawanan iti kontrol iti manibela ket naipan iti bangir a linya isu a naidungpar iti sumungad nga SUV.
Nagsagaba iti adu a dunor ti bagi ti drayber ti motorsiklo a puon ti nakatayanna idinto a saan a naan-ano ti drayber ti SUV.
