VIGAN CITY – Nagsagaba iti dunor ti maysa a nagmaneho iti motorsiklo gapu ti pannakaidungparna iti kurong-kurong idiay Barangay Bayubay Norte, San Vicente.
Nabigbig ti nagmaneho iti Honda Beat a motorsiklo a ni Chynbert Pido Tablada, agtawen iti duapulo ket uppat, agnaed iti Barangay Bayubay idinto a ti kurong-kurong ket minaneho ni Roel Taguba Miravel, agtawen iti tallopulo, kadua ti pasaherona a ni Ian Labbao Miravel, agtawen iti sangapulo ket walo, agpada a tubo iti Aparri, Cagayan ngem agdama nga agnaed iti Sitio Urdas, Barangay San Sebastian, San Vicente.
Bumalballasiw ti kurong-kurong iti provincial road nga agturong iti laud a direksyon idin ta nadungpar ti agpapalaud a motorsiko.
Gapu dayta, nagsagaba ti drayber ti motorsiklo iti dunor iti akin-kannawan a sakana, lemma iti ulo ken gasgas ti nadumaduma a paset ti bagina ken naipaagas iti ospital para ti pannakatamingna idinto a ti drayber ti kurong-kurong ket saan a naan-ano ngem ti pasaherona ket nagasgasan ti abagas ken sakana a naipaagas met laeng iti ospital para ti pannakatamingna.
Kabayatanna, nakasuot iti helmet ti drayber ti motorsiklo idinto a ti drayber ti kurong-kurong ket nakainom idi napasamak ti aksidente.
