Dead on arrival dagiti nagkalubbon iti motorsiklo kalpasan a nakadinnungpar ti luganda ti maysa a cargo truck idiay Barangay Dardarat, Tagudin, Ilocos Sur.
Ti drayber ti Rusi 150X a motorsiklo ket lalaki nga agtawen iti tallopulo, kinalubbonna ti lalaki nga agtawen iti tallopulo ket lima, agpada a taga-Tagudin.
Ti met Isuzu Cargo Truck Dropside ket minaneho ti lalaki nga agtawen iti limapulo ket tallo, taga-Vintar, Ilocos Norte.
Napaspas ti pataray ti motorsiklo nga agpaamianan a direksion ket natukbobna ti trak.
Gapu dayta, naipurwak dagiti nagkalubbon iti motorsiklo ket nagsagrapda iti nakaro a dunor iti ulo ken nadumaduma a paset ti bagida.
Naipaagasda iti ospital para iti pannakatamingda ngem saandan a nakalasat.
Saan met a naan-ano ti drayber ti trak.
