VIGAN CITY – Maysa ti natay ken maysa ti nadunor iti napasamak nga aksidente idiay Barangay San Pablo, San Esteban, Ilocos Sur a nakairamanan dagiti tallo a lugan.
Ti Isuzu Eif mini truck ket minaneho ni Herbert Ines Yadao, agtawen iti uppat a pulo ket uppat, mekaniko, kaduana ti helperna a ni Marlon Pascua, agpada a taga-Barangay San Bernabe, Sarrat, Ilocos Norte.
Ti met Isuzu truck tractor ket minaneho ni Feljun Mayola Catubig, agtawen iti tallopulo ket uppat, inluganna da Melody Binondo Gutual, agtawen iti tallopulo ket dua, agpada a taga-Pulong Santa Cruz, Santa Rosa, Laguna.
Kabayatanna, ti met Toyota Innova a nakaparking ket kuku ani Francisco Tabilog, agtawen iti innem a pulo ket lima, taga-Barangay San Pablo, San Esteban.
Agpada nga agdaldalyasat iti national highway ti Barangay San Pablo, San Esteban, Ilocos Sur a ti Isuzu Elf truck ket agpa-amianan idinto a ti Isuzu truck tractor ket adda iti bangir a linya.
Segun ken ni Jade Agcaoili Ordoñez a nakaimatang iti pasamak, immagaw ti tractor iti linya ket nagdinnungparda ti mini truck.
Gapu dayta, nadunor ti nadumaduma a paset ti bagi ti nagmaneho iti mini truck idinto a ti helper na ket naideklarar a dead on arrival.
Malaksid iti dayta, idi napasamak ti panagdinnungpar, nasagid ti mini truck ti Toyota Innova a nakaparking iti abagatan a shoulder lane isu a nadadael ti lef side bumper na iti likod ken ti windshield na.
