VIGAN CITY – Maysa ti nadunor iti napasamak nga aksidente idiay Barangay Pandan, Caoayan a nakairamanan ti maysa a kurong kurong ken motorsiklo.
Ti kurong-kurong ket minaneho ni Jaime Cabanig Arquelada Jr., agtawen iti duapulo ket uppat, mangngalap, taga-Barangay Fuerte, Caoayan.
Dagiti naglugan ket da Regine Soberano Vallejos, agtawen iti duapulo ket dua; Aoril Ann Soberano Amanonce, April Soberano Amanonce, agpada nga agtawen iti sangapulo ket siam; ken ni Rochelle Soberano Villejos, agtawen iti sangapulo ket walo, agpapada a taga-Barangay Fuerte, Caoayan.
Ti met motorsiklo a Honda Wave 100 motorcycle ket minaneho ni P Jay Deocares Hipolito, agtawen iti duapulo ket pito, construction worker, taga-Beddeng Laud, Vigan City a mapapati a nakainom iti arak.
Iti pannaki-uman ti Bombo Radyo Vigan ken ni Police Executive Master Sergeant Harold Baquiran, gpapa-abagatan ti kurong-kurong idin ta idi madanonna ti nakapasamakan ti insdente, immagaw ti linya ti motorsiklo ket nagdinnungparda.
Innayonna a nakainom ti drayber ti motorsiklo idi mapasamak ti aksidente isu a sinursurot pay daytoy dagiti kaduana a naginom.
Saan a naan-ano ti drayber ken dagiti inlugan ti kurong kurong idinto a ti drayber ti motorsiklo ket nadunor ti ulona a naipaagas iti Ilocos Sur Provincial Hospital-Gabriela Silang, Vigan City para iti naan-anay a pannakatamingna.
