Panagdinnungpar ti kurong-kurong ken trak, maysa ti natay

VIGAN CITY – Maysa ti natay iti napasamak a panagdinnungpar ti kurong-kurong ken trak idiay Barangay Bulbulala, Santiago.

Nabigbig ti natay a drayber ti kurong-kurong a ni Jerry Rabe Mariano, agtawen iti limapulo ket maysa, agnaed iti Barangay Apatot, San Esteban.

Ti met nagmaneho iti trak ket ni Joegene Mendoza Ocampo, agtawen iti uppat a pulo ket uppat, agnaed iti Guagua, Pampanga.

Agpapa-abagatan ti trak idin ta ti kurong-kurong nga adda iti shoulder ti kalsada ket linisyanna ti sign board ket naawanan ti kontrol iti manibela isu a naidungpar iti makasinnabetna a trak.

Gapu dayta, naikkat ti motorsiklo a naikabit iti sidecar idinto a naipurwak ti drayber.

Nadundunor ti drayber a naipaagas iti ospital ngem naideklarar a dead on arrival.