VIGAN CITY – Natay dagiti aglive in partner a nagkalugan iti kurong-kurong gapu iti panagdinnungparda iti kotse iti national highway ti Barangay Jordan, Sinait.
Nabigbig ti nagmaneho iti Toyota Vios a kotse a ni Ruth Eisma Aglipay, agtawen iti tallopulo ket innem, taga-Barangay Poblacion 2, Currimao, Ilocos Norte.
Inluganna da Jackilou Sahagun Valencia, agtawen iti uppat a pulo, taga-Barangay Bungkag Dingras, Ilocos Norte; Maria Eloysa Sacro, agtawen iti tallopulo ket siam, taga-Barangay Ablan, Batac City, Ilocos Norte ken ti maysa nga agtawen-iti-sangapulo ket maysa a babai, taga-Barangay Bungkag, Dingras, Ilocos Norte.
Ti met nagmaneho iti kurong-kurong ket ni Robert Tangonan Yagin, agtawen iti tallopulo ket pito, backrider n ani Lyka Alon Montemayor, agtawen iti duapulo ket siam, agpada a taga-Barangay Katipunan, Sinait.
Agpapa-amianan ti kotse idinto nga aggapu iti bangir a linya ti kurong-kurong ket idi madanunda ti nakapasamakan ti insidente, nagdinnungpar dagiti lugan iti linya ti kotse.
Nagsagaba iti fatal injuries dagiti nagkalugan iti kurong-kurong a naitaray iti Corpuz Clinic and Hospital ngem naideklarar a dead on arrival idinto a ti drayber ken maysa a pasahero ti kotse ket nagsagaba met iti minor injuries a naipaagas iti Ilocos Sur District Hospital-Sinait para ti pannakatamingda.
Addan iti kustodia ti Sinait Police Station ti drayber ti kotse tapno maidalan iti husto a proseso.
