Nadunor dagiti nagkalubbon iti motorsiklo gapu iti aksidente a napasamak iti national highway idiay Barangay Sta. Monica, Magsingal, Ilocos Sur a nakairamanan ti maysa pay a kotse.
Ti Yamaha Mio 125 ket minaneho ni Jay Mark Natividad Ullero, agtawen iti duapulo ket tallo, taga-Barangay Maas-asin, Magsingal, backrider-na ti maysa a menor de edad a babai a kalugaranna.
Ti met kotse ket minaneho ni Kaezle Quinsaat Concordia, agtawen iti tallopulo ket lima, taga-Barangay Sta. Monica, Magsingal.
Maibasar iti CCTV footage, agpapa-abagatan ti motorsiklo idinto a ti kotse ket adda iti southbound shoulder a sumangsango iti abagatan, ket idi madanonda ti nakapasamakn ti insidente, nagsikko ti kotse a saan a nagsenyal isu a nagdinnungparda ti motorsiklo.
Nadunor ti nadumaduma a paset ti bagi dagiti nagkalubbon a naipaagas iti ospital para iti naan-anay a pannakatamingda idinto a ti drayber ti kotse ket saan a naan-ano.
Ikot metten ti Magsingal Police Station dagiti lugan para iti proper disposition.
Awan ti nakainom kadagit karaman ken nakasuot nga agpada iti helmet dagiti nagkalubbon.
