Naipaagas dagiti innem a karaman iti panagdinnungpar ti kotse ken kurong-kurong iti national highway ti Barangay Olo-Olo Norte, Santiago, Ilocos Sur.
Ti kotse ket minaneho ti maysa a babai nga agtawen iti uppat a pulo ket dua, agnaed iti Barangay Tamag, Vigan City.
Ti met kurong-kurong ket minaneho ti maysa a lalaki nga agtawen iti duapulo ket uppat, ken adda tallo nga inluganna nga agpapada a taga-Barangay Salay, Mangaldan, Pangasinan.
Iti pannaki-uman ti Bombo Radyo Vigan ken ni PEMS Iris Lois Pamaran, agpapa-abagatan ti kotse, idinto nga adda iti bangir a linya ti kurong-kurong.
Idi madanon ti nakapasamakan ti aksidente, immagaw ti kurong-kurong iti linya gapu iti panaglock ti manibela isu a nagdinnungparda iti kotse.
Gapu dayta, agalen ti drayber ti kotse ti nasakit a bagbagina idinto a ti drayber ken inlugan ti kurong-kurong ket nadunor.
