Tallo ti nadunor iti panagdinnungpar dagiti dua a motorsiklo iti barangay road idiay Barangay San Agustin, Candon City, Ilocos Sur.
Nabigtbig ti drayber iti black/red Euro Motor Rapido 110 a ni Joshua Carpina, agtawen iti duapulo ket dua, kinalubbonna ni Jerreal Carpina, agtawen iti duapulo ket walo, agpada a taga-Quimmarayan, Barangay Caterman, Candon City.
Ti met nagmaneho iti black Motorstar ket ni Paul Joshua Inigo Esguerra, agtawen iti duapulo ket lima, aircon technician, taga-Barangay Bagar, Candon City.
Agpapa-abagatan ti Euro idinto ta adda iti bangir a linya ti Motorstar ket idi nadanonda ti nakapasamakan ti insidente, inovertakean ti Euro ti sarsarunwenna a motorsiklo ket nagdinnungparda iti Motorstar.
Gapu dayta, nadunor ti nadumaduma a paset ti bagi dagiti nagkalubbon idinto a nakaro ti sinagaba a dunor ti drayber ti Motorstar.
Naipanda iti ospital para iti naan-anay a pannakatamingda.
