VIGAN CITY – Tallo ti nadunor iti panagdinnungpar ti dua a motorsiklo idiay Barangay Pagsanaan Sur, Magsingal, Ilocos Sur.
Menor de edad dagiti nagkalubbon iti Black Kawasaki Fury 125, taga-Pagsanaan Norte, Magsingal, agpada a nakainom ken awan ti suotda a helmet.
Kabayatanna, ti met Black Yamaha Aerox ket minaneho ni Noel Tunog Arellano, agtawen iti tallopulo ket dua, construction worker, taga-Barangay Manzante, Magsingal.
Agpapalaud ti Kawasaki Fury 125 idinto nga adda iti bangir a linya ti Yamaha Aerox ket idi madanonda ti nakapasamakan ti aksidente, immagaw ti linya ti Kawasaki Fury isu a nagdinnungparda ti Yamaha Aerox.
Nagsagaba iti head injury dagiti dua a menor de edad idinto a ti nagmaneho iti Yamaha Aerox ket nadunor ti nadumaduma a paset ti bagina.
Agpapada a naipaagas iti ospital dagiti karaman iti aksidente para iti pannakatamingda.
