VIGAN CITY – Maysa ti natay iti napasamak a panagdinnungpar dagiti dua a motorsiklo idiay Rivero Extension Street, Barangay Beddeng Laud, Vigan City, Ilocos Sur.
Ti Yamaha Mio I ket minaneho ni John Carlo Quitoriano, agtawen iti duapulo ket uppat, awan driver’s license na taga-Barangay Cabalangegan, Vigan City.
Ti met Yamaha Mio Sporty ket minaneho ni Emelita Pre Abendanio, agtawen iti tallopulo ket siam, backrider-na ti anakna nga agtawen iti sangapulo ket tallo, taga-Barangay Anonang Menor, Caoayan.
Iti pannaki-uman ti Bombo Radyo Vigan ken ni PLTCOL Rogelio Remiendo Jr., agpapa-amianan ti Mio I ket idi nadanunna ti nakapasamakan ti insidente, immagaw ti linya ket nagdinnungparda ti Mio Sporty a makasabetna.
Nadunor iti nadumaduma a paset ti bagi ti nagmaneho iti Mio I idinto a nakaro a dunor met ti sinagrap ti nagmaneho ti Mio Sporty a puon ti nakatayanna.
Kabayatanna, ti menor de edad nga anak ti natay ket nagsagaba met iti minor injuries a maag-agasan ita iti ospital.
