VIGAN CITY – Maysa ti natay iti panagdinnungpar ti dua a motorsiklo idiay Barangay Puro, Magsingal.
Ti white-maroon Honda Wave 110 a motorsiklo ket minaneho ni Mark Genel Ricamoro Tab, agtawen iti duapulo, agnaed iti Barangay Puro, Magsingal.
Ti maysa pay a green Honda Wave 110 a motorsiklo ket minaneho ni Ronaldo Tagay Oxciano, agtawen iti duapulo ket lima, agnaed iti Barangay Puro, Magsingal kaduana ti backrider a ni Abdon Ernie Torda, agtawen iti duapulo, agnaed iti Bolinao, Pangasinan.
Daldalyasaten dagiti dua a motorsiklo ti agsinnumbangir a linya a dagitoy ket agpada nga awan ti headlight-na ket nagdinnungparda gapuanan ti pannakasagrapda iti dunor.
Naipaagas ti dua a drayber iti Tolentino Doctors Hospital para iti pannakatamingda ngem dead on arrival ni Tab idinto a matamtaming iti balay pagagasan dagiti nagkalubbon.
Natakuatan nga agpada a nakainom dagiti dua a drayber idi mapasamak ti aksidente.
