VIGAN CITY – Tallo a tao ti nadunor iti panagdinnungpar ti dua a motorisko iti barangay road iti Binacud, Sinait, Ilocos Sur pakairamanan ti maysa a barangay kagawad
Nabigbig ti nagmaneho ti asul a Honda Click motorcycle a ni Ronald Yagin, agtawen ti limapulo ket siam, ken ti backride nga asawa na a ni Angelita Villegas Yagin, agpada a saan a nakasuot ti helmet, awan plaka ti luganda ken agpada a taga Brgy Katipunan Sinait.
Idinto a ti nagmaneho ti puraw a Rusi bigbike motorcycle ket ni Jeffrey Cagat Barut, maysa a Brgy Kagawad,mapapati a nakainom iti arak, ken saan a nakasuot ti helmet a taga Barangay Marnay, Sinait.
Agpapalaud a direksyon ti Honda click idi nadanonna iti agsikko a paset ti kalsada , nagdinnungparda iti big bike manipud iti bangir a direksyon gapo iti napartak unay a panagpataray ni Barut.
Gapo dayta, nagsagaba ti drayber ti Honda click ti head injury ken gasgas idinto a ti back riderna ket nakapasar metlaeng ti gasgas ken sugat iti kannigid a rupa . Ti met drayber ti big bike ket nakapasar ti panagsakit iti barukong, gasgas ken limteg ti rupa na
Nupay kasta, dagiti tallo ket naipan iti Sto. Cristo Milagroso Hospital, Sinait para iti naan-anay a panankatamingda.
