VIGAN CITY – Dua ti natay iti napasamak nga aksidente iti Barangay Jardin, Tagudin a nakairamanan ti maysa nga Isuzu Trailer truck ken Toyota Revo.
Ti trak ket minaneho ni Eduardson Panlasigui Roque, agtawen iti uppat a pulo ket uppat, taga-Bagu, Pamplona, Cagayan.
Kabayatanna, ti met nagmaneho iti Revo ket ni Rowell Dalilis Buclig, agtawen iti uppat a pulo ket maysa kadua dagiti pasaherona a da Raymond Dalilis Kitan, agtawen iti tallopulo ket innem, Karen Joy Perweg Kitan, agtawen iti tallopulo ket maysa, Cristina Buclig, agtawen iti innem a pulo ket lima ken dagiti dua pay nga ubbing nga agtawen iti walo ken sangapulo, agpapadada amin a taga-Ambuklao, Baguio City.
Agpapa-abagatan ti trailer truck idinto a ti revo nga adda iti bangir a linya ket nagovertake iti sarsarunwenna a lugan iti kurbaan a paset ti kalsada.
Nagpreno ti drayber ti trak idi makitana ti revo ngem nagdinnungparda latta.
Naipaagas iti ospital ti drayber ken dagiti pasahero ti revo para ti pannakatamingda ngem dead on arrival ti drayber ken ti senior citizen a kaduada a ni Buclig.
Nadunor met ti nadumaduma a paset ti bagida dagiti pasahero idinto a ti drayber ti trailer truck ket saan a naan-ano.
