Dead on arrival ti maysa a drayber iti panagdinnungpar ti motorsiklo ken bus iti national highway ti Barangay Tapao, Sinait, Ilocos Sur.
Nabigbig ti drayber ti Yamaha KTM Duke a ni Jerome Pizzaro Villegas, agtawen iti duapulo ket tallo, taga-Barangay Zone 4, Bantay, nakasuot iti helmet.
Ti met drayber ti Hino GMW bus (Florida) ket ni Geodannie Aguila Mangrubang, agtawen iti tallopulo ket walo, taga-Barangay Katipunan, Sinait.
Maibasar iti imbestigasyon, agpapa-amianan ti napaspas ti tarayna a motorsiklo nga immuna pay a naidungpar iti barikada ti Ilocos Sur Provincial Animal Quarantine Checkpoint isu a saanna a nakontrol ti manibela ti luganna ket nagdinnungparda ti agpapa-abagatan a bus.
Gapu dayta, nadunor ti nadumaduma a paset ti bagi ti drayber ti motorsiklo a naitaray iti ospital ngem saanen a naisalakan ti biagna.
Saan met a naan-ano ti drayber ken dagiti pasahero ti bus.
Malaksid dayta, agpada a nakaro ti dadael dagiti dua a lugan nga ita ket nakakustodian iti Sinait Police Station para iti proper disposition.
