VIGAN CITY – Maysa ti natay iti panagdinnungpar ti Florida bus ken Raider a motorsiklo iti national highway ti Barangay Caburao, Santiago.
Nabigbig ti biktima a ni Albert Mariano Costales, agtawen iti uppat a pulo ket dua, agnaed iti Barangay Bagani Ubbog, Candon City, nagmaneho iti motorsiklo.
Ti met nagmaneho iti bus ket ni Joefrey Pacris Tabora, agtawen iti tallopulo ket siam, company driver, agnaed iti Barangay Callungan, Sanchez Mira, Cagayan.
Iti pannaki-uman ti Bombo Radyo Vigan ken ni Police Major Henry Garcia, agpapa-amianan ti bus idinto nga agpapa-abagatan met ti motorsiklo nga immagaw ti linya a puon ti napasamak a head-on collision wenno panagdinnungpar.
Gapu dayta, nagsagaba ti nakaro a dunor iti nadumaduma a paset ti bagina ti drayber ti motorsiklo a daytoy ket naipit pay ti sakana iti siruk ti bus.
Naitaray iti ospital ngem dead on arrival idinto a saan met a naan-ano ti drayber ken pasahero ti bus.
Kinuna ni Garcia a napataray ti drayber ti motorsiklo gapu ti pannakawara ti luganna.
Malaksid dayta, maibilang pay nga accident prone area ti lugar a nakapasamakan ti aksidente.
