VIGAN CITY – Maysa ti nadunor iti panagdinnungpar ti bus ken motorsiklo idiay Barangay San Nicolas, Candon City.
Nabigbig ti nagmaneho iti Hino Florida Bus a ni Jefferson Ribucan Tumbaga, agtawen iti tallopulo ket maysa, bus driver, agnaed iti Barangay Bacsil, San Juan.
Ti met nagmaneho iti motorsiklo ket ni Marco Ramos Apilado, agtawen iti duapulo ket siam, utility iti maysa a fast food chain, agnaed iti Barangay San Juan, Candon City.
Iti pannaki-uman ti Bombo Radyo Vigan ken ni Police Corporal Jonathan Castro, agpapa-abagatan ti bus idin ta inovertakeanna ti sarsarunwenna a traysikel ket nagdinnungparda ti nakasabetna a motorsiklo iti bangir a linya.
Gapu dayta, nadunor ti nadumaduma a paset ti bagi ti drayber ti motorsiklo a naipaagas iti ospital para ti pannakatamingna idinto a saan met a naan-ano ti drayber ken dagiti pasaherona.
Nakasagana met ti drayber ti bus a tumulong iti panagpaagas ti drayber ti motorsiklo.
