Maysa ti natay iti panagdinnungpar dagiti dua a motorsiklo iti barangay road idiay Danuman West, Sta. Maria, Ilocos Sur.
Nabigbig ti drayber ti Red 125 Honda XRM motorcycle a ni Bonifacio Lilan, adda helmet-na, taga-Barangay Imus, Santiago ngem aggigyan idiay Barangay Poblacion Sur.
Ti met Euro Daan Hari motorcycle ket minaneho ni Raffy Angel Daproza, agtawen iti duapulo ket dua, construction worker, awan helmet-na, taga-Barangay Poblacion Norte, Sta. Maria.
Iti pannaki-uman ti Bombo Radyo Vigan ken ni PLT Jenson Refuerzo, agpapalaud ti XRM idinto nga adda iti bangir a linya ti Euro, ket idi nangtengda ti nakapasamakan ti insidente, immagaw ti linya ti XRM ket nagdinnungparda iti Euro.
Nadunor ti nadumaduma a paset ti bagi dagiti dua a drayber a naipaagas iti ospital para iti pannakatamingda ngem dead on arrival ti drayber ti XRM.
