Uppat ti nadunor iti panagdinnungpar dagiti dua a motorsiklo idiay Barangay Oaig-Daya, Candon City, Ilocos Sur.
Ti nagmaneho iti Euro 125 motorcycle ket lalaki nga agtawen iti duapulo ket dua, kinalubbonna ti lalaki nga agtawen iti sangapulo ket siam nga agpada a taga-Barangay Paras.
Ti met Honda TMX ket minaneho ti lalaki nga agtawen iti limapulo ket maysa, construction worker, kinalubbonna ti babai nga agtawen iti uppat a pulo ket tallo, caregiver, taga-Barangay Lang-ayan, Santiago.
Agpapa-amianan ti Euro ket idi madanon ti nakapasamakan ti aksidente, ti Honda TMX iti bangir a linya ket nagsikko nga agpa-kannigid a saan a nagsenyal a sumrek iti barangay road isu a nagdinnungparda.
Nadunor dagiti dua a drayber ken dagiti backrider isu a naipaagasda iti ospital para iti pannakatamingda.
