VIGAN CITY – Uppat ti nadunor iti napasamak a panagdinnungpar dagiti dua a lugan idiay Barangay Maynganay Norte, Sta. Maria, Ilocos Sur.
Ti Blue Toyota Wigo ket minaneho ni Ephreine Rodriguez Chavez, agtawen iti tallopulo ket tallo, mangisursuro iti Ilocos Sur Polytechnic State College.
Inluganna da Jennifer Calibuso Chavez, agtawen iti tallopulo ket siam, mangisursuro ken dua nga ubbing a ti tawenda ket pito ken tallo, agpapadada a taga-Barangay Poblacion Sur, Sta. Maria.
Ti met met Mitsubishi Strada ket minaneho ni Nerie Doque Bayuca, agtawen iti duapulo ket pito, taga-Barangay Subadi Norte, Burgos.
Agpapadaya ti Toyota Wigo idinto nga aggapu iti bangir a linya ti Mitsubishi Strada, ket idi madanonda ti nakapasamakan ti insidente, nagdungsa ti drayber ti Strada ket napan iti tengnga ti kalsada a puon ti panagdinnungparda ti Toyota Wigo.
Nupay kasta, saan a naan-ano ti drayber ken pasahero ti Mitsubishi Strada ngem dagiti naglugan iti Wigo ti nadunor iti nadumaduma a paset ti bagida.
Saan pay nga ammo no mano ti gatad ti panagpaistimar dagiti nadadael a paset dagiti lugan.
