Inallukoy ni Education Secretary Sonny Angara dagiti pagadalan iti intero a pagilian a papigsaen ti akem ti Parent-Teacher Associations kagiddan ti panangpabileg ti Department of Education iti seguridad dagiti pagadalan.
Dayta ket kas napateg a katinnulong iti panangaywan iti kasasaad dagiti agad-adal ken pananglapped kadagiti insidente ti kinaranggas kadagiti pagadalan.
Segun iti DepEd, napateg a plataporma dagiti PTA iti nasapa a panangbigbig dagiti parikut a sangsangwen dagiti agad-adal, panangted iti kasapulanda a suporta, ken panangpatignay iti komunidad para iti pannakasaluadda.
Iti salinong ti Omnibus PTA Guidelines, agserserbi dagiti PTA kas pormal a mekanismo a mabalin a pangtrataran dagiti nagannak ken mangisursuro dagiti isyu a sangsangwen dagiti agad-adal ken dagiti posible a solusyon.
Innayon ti DepEd a mapasarunwan daytoy iti pannakibinnulig kadagiti lokal a gobierno, civic organizations, ken dadduma pay a katulongan tapno maital-o ti kasasaad dagiti agad-adal.
