Manamnama a maleppas ti National Board of Canvassers iti panagbilang dagiti botos para iti national position ita nga aldaw, May 15, 2025.
Ti addang ket kalpasan a kinidaw ni Comelec Chairman George Erwin Garcia kadagiti miembro ti National Board of Canvassers a mabilang dagiti botos nga umabot ti sangagasut a Certificate of Canvass nu insigida laketdi a makastrek iti Consolidation and Canvassing System.
Segun ken ni Garcia, umabot iti limapulo ket walo iti COC ti nabilang a botos idi May 13 manipod overseas voting, Local Absentee Voting, dagiti probinsia ken highly urbanized city.
Saan nga umuna a gundaway dayta iti panag-canvass iti komisyon iti kaadoan a COC iti umuna nga aldaw ti canvassing.
Kalpasan a maiproklamar dagiti senador ket maisayangkat ti proklamasyon kadagiti party-list groups tapno maliklikan iti panagseseksek iti venue ken tapno mapatulodan iti pormal nga imbitasyon dagiti nangabak.
Kabayatanna, inlawlawag ni Garcia a saan a kayatna a sawen nga adda iregularidad ti napaspas a canvasing dagiti botos.
