Inkalintegan ti Malakanyang a ti panagbaliw ti presyo ti langis iti world market ti rason ti saan a panangituloy ti gobierno ti panangipaayda iti fuel subsidy iti transport sector uray kadagiti mannalon ken mangngalap.
Dayta ket gapu iti pannakadismaya dagiti dadduma a transport group iti saan a natuloy a fuel subsidy iti napan a lawas kalpasan a ngimmato iti agingga lima pisos ti presyo ti langis.
Segun ken ni Palace Press Officer Atty. Claire Castro, saan nga umabot iti $80 per barrel ti krudo nga isu ti pagibasaran tapno mangted iti fuel subsidy ti gobierno.
Kunana nga adda dagiti gundaway a saan a dagus a makadesisyon ti gobierno ta nakadependeda ti agdama a sitwasyon kas ti napasamak a rinnupak idiay Iran ken Israel a nagsardeng met laeng sakbay pay a mairusat ti fuel subsidy.
Innayon ni Castro a saan nga ipaidam ti gobierno no ania ti kasapulan ti transport sector no la ket mayannatup iti linteg ken dagiti pagallagadan ta karaman kadagiti prayoridad ni Presidente Ferdinand Marcos Jr ti kasasaad dagiti PUV driver, operator ken transport group.
