Kinumpirmaran ni Senate President Pro Tempore Jinggoy Estrada nga adda dagiti ar-aramidenda nga addang tapno maibilang a cybercrime offense nga adda nadagsen a pannusana ti panagiwaras iti fake news wenno palso nga impormasyon iti social media.
Ti kinaagpaysona ket nangrugin ti panagdengngeg ti Senate Committee on Public Information and Mass Media kadagiti gakat a kunana nga ikagumaanda a pagbalinenda a linteg.
Maysa kadagiti impilana ti Senate Bill 1296 a mangiduron iti pannakairaman ti fake news kas krimen iti salinong ti Cybecrime Prevention Act of 2013 ken adda pannusana nga innem agingga sangapulo a tawen a pannakaibalud.
Inkalintegan ni Estrada a panawenen tapno maipatungpal ti nadagdagsen a pannusa iti panagiwaras iti fake news nga inaramid a pagsapulan ti dadduma ta allilawenda ti publiko ken isu ti pagtataudan ti riri.
Inyarig ti senador ti babai a vlogger a kinemmegti National Bureau of Investigation idiay Cebu nga inaklonna nga adda napastrekna iti inwarasna nga impalubos ni Presidente Ferdinand Marcos Jr a legal ti droga uray no saan a pudno.
