VIGAN CITY – Inlawlawag ni IAV Noreen Bautista iti Philippine Drug Enforcement Agency-Ilocos Sur a saan a maapektaran ti panagbalin a drug-cleared ti maysa a barangay no adda natiliw iti nasao a lugar.
Dayta ket kalpasan ti pannakakumpiskar dagiti operatiba iti nasurok kumurang walopulo a gramo ti mapapati a shabu nga aggatad iti PHP560K.
Iti pannaki-uman ti Bombo Radyo Vigan ken ni Bautista, nasaysayaat pay dayta tapno mapaneknekan a mamonmonitor met laeng dagiti drug personality.
Sa laeng met marevoke ti panagbalin a drug cleared ti maysa a lugar no adda natiliw a saan a namonitor wenno saan a matiliw mismo iti uneg ti dayta a lugar, kasta payen no agtaltalinaed pay laeng.
Dayta ket kalpasan ti balligi a pannakatiliw babaen iti nagtipon a puersa ti PDEA-Ilocos Sur ken Ilocos Sur Police Provincial Office kadagiti agassawa a da Aniceta ken ni Michael Ustari a naalaan ti 80grams ti shabu.
Ti babai a suspek ti target ti operasyon ta nabayagen nga imonmonitorda gapu ta idi 2014 ket natiliw manen ngem nawaya-wayaan kalpasan a nakapag plea bargain.
Segun ken ni Bautista, adu dagiti laklakwanda ti kabangibang nga ili ken agpada a nagpositibo dagiti agassawa iti iligal a droga.
