VIGAN CITY – Maysa nga agtawen-iti-innem a pulo ket lima a lalaki ti natay, idinto a pito ti nadunor kalpasan ti panagbaliktad ti kuliglig a linugananda iti Abra-Kalinga Road idiay Sitio Nagwayan, Barangay Subagan.
Segun iti Licuan-Baay Municipal Police Station, nag-malfunction ti preno ti tri-wheeled vehicle a nangilugan kadagiti sangapulo ket uppat a pasahero kabayatan ti panagsalogda iti Abra-Kalinga road isu a saanen a nakontrol pay ti drayber.
Dagus met a naipaagas dagiti karaman iti aksidente iti Abra Provincial Hospital babaen kadagiti nagresponde a personnel ti Licuan-Baay Municipal Police Station Bureau of Fire Protection Lucuan-Baay, Municipal Disaster Risk Reduction and Management ken Philippine Army.
Maysa kadagiti biktima a ni Molino Sabado, agtawen iti innem a pulo ket lima ti naideklarar a dead on arrival.
Dagiti pito met a pasahero a nadunor ket da Benito Baula, agtawen iti duapulo ket innem, Gemma Sigabu Gudtan, agtawen iti limapulo ket dua, Mario Gudtan, agtawen iti limapulo ket uppat, Jackson Cayung, agtawen iti tallopulo ket uppat, Anita Zapata, agtawen iti innem a pulo ket siam, Delfin Tandingan, agtawen iti innem a pulo ket maysa, ken ni Marcelino Baola, agtawen iti innem a pulo ket dua.
Kabayatanna, dagiti lima pay a pasahero a da Oswald Zapata, agtawen iti tallopulo ket tallo, Carlo Jay Amado, agtawen iti tallopulo, Arthur Buyao, agtawen iti duapulo ket walo ken dagiti dua a menor de edad ket nakaawidda met laeng nga nsigida kalpasan ti medical assessment da.
Ti met nagmaneho a ni Jafer Ramirez Tangonan, agtawen iti uppat a pulo ket tallo ket nakakustodia iti Licuan-Baay Police Station para iti imbestigasyon.
