VIGAN CITY – Manamnama nga inton sumaruno a lawas ket marugianen ti panagbakuna iti A5 priority group a pakaibilangan dagiti indigent family ditoy siudad ti Vigan.
Segun ken ni Mayor Juan Carlo Medina, 5,700 nga Astrazeneca vaccine ti simmangpet ditoy siudad nga isu ti agdama a maibakbakuna isu a kiniddawna kadagiti senior citizen nga agpabakuna ta sangaribo laengen kadakuada ti nabatbati a saan pay a nabakunaan agsipud ta iti kallabes ket naaramid ti house-to-house vaccination kadakuada.
Iti agdama, limapulo a porsienton ti nakaawat iti first dose ti bakuna idinto a 17,000 a tattao ti fully-vaccinated ditoy siudad ket manamnama nga inton Oktubre wenno Nobyembre ket mabakunaan iti first dose ti 70-80 percent iti populasyon.
Kabayatanna, pagtintinnulongan ti city government ken ti Rural Health Unit tapno mabakunaan payen dagiti kayatnan ti agpabakuna.
