VIGAN CITY – Parikut tatta dagiti residente ken kasta payen dagiti Pilipino nga agtrabtrabaho idiay Rome, Italy ti panagalada ti tulong nga aggapu iti gobiernoda iti kangitingitan ti lockdown gapu iti COVID19.
Segun ken ni Bombo International Correspondent Demetrio “Bong” Rafanan, online ti wagas a panagapply tapno makaala ti tulong ngem kunana a saan met nga amin ket addaan iti computer kadagiti pagtaenganda ken saan nga amin ket ammoda amin iti wagas no kasano nga aramaten ta madi met pay ti mapan iti embahada gapu ngarud iti pammilin a madi ti rumuar tapno maparmeken ti nasao a sakit.
Ingunamgunam ni Demetrio nga adda met ti rekord ti embahada kadagiti nagan dagiti Pilipino a naawanan ti trabaho ken rumbeng a maikkan ti tulong isu a kasapulan nga isuda koma ti agtignay a mangipadanun kadakakuada iti tulong ken kasta payen a kunana nga itarusda koma iti Ingles dagiti form a maiwaras agsipud ta saan met nga amin a Pilipino nga adda iti nasao a pagilian ket makaawat iti Italian language.
No pay kasta, kunana nga adda ti grupoda a Pilipino a gagemda a makikammayet iti gobierno ti nasao a pagilian ken iti konsulado no kas man bilang adda dagiti parikut iti tunggal OFW tapno insigida matignayanda.
