Kayat a palimitaran ti Senado ti panagaramat dagiti menor de edad iti social media tapno maliklikan ti overexposure ken negatibo nga epektona kadagiti agtutubo.
Dinakamat ni Senador Ping Lacson ti panagadal ti United Nations Children’s Fund, a rumrumuar a dagiti agtutubo a Pilipino ket expose-da iti cyberbullying, body image pressure, ken online harassment gapu iti sobra a social media exposure.
Babaen iti gakat nga “An Act Regulating the Use of Social Media Platforms by Minors” nga impila ni Lacson, maobligar dagiti social media platform a maaddaan iti ‘reasonable steps’ ken ‘age verification measures’ para iti panagaramat iti social media.
Karaman kadagiti obligasyon ti social media platforms ket ti ID verification, facial recognition, ken dadduma pay nga identity authentication systems; regular audit ti user account data; ken panangresponde kadagiti age-restricted users iti plataporma.
P1 million agingga P20 million ti muelta dagiti social media platform ken service provider a manglabsing no bilang agbalin a linteg.
