VIGAN CITY – Nangiruar ti San Juan Municipality iti Municipal Ordinance No. 06-2019 para kadagiti motorista nga agus-usar ti motorcycle, e-bike, scooters ken bicycle riders a mangrequire iti panagaramat ti high visibility reflectorized vest kadagiti agdaliasat ti main road, barangay road, ken national highway.
Iti pannaki-uman ti Bombo Radyo Vigan ken ni Police Major Benjamin Raquendan, hepe ti San Juan Municipal Police Station, ti ordinansa ket mangrugi a mayemplementar inton Lunes manipud iti alas sais ti rabii agingga alas sais ti bigat.
Naputar ti ordinansa gapu ta napaliiw dagiti Sanggunian Bayan Member nga adda dagiti lugan nga awanan ti silaw, ken tapno maliklikan payen ti pannakaaksidente dagiti motorista.
Segun ken ni Police Major Raquendan, nawarasan aminen a Barangay Captain ti San Juan tapno mabagaan dagiti bumarangay.
Kabayatanna, para kadagiti saan met a taga-San Juan a lumabas ti ili, maballaaganda nga umuna ngem mailista ti naganda ket no aglabsingda iti sumaruno a gundaway, mamueltadanton ti P500 pesos para ti 1st offense, ken P1000 pesos para ti second offense.
