VIGAN CITY – Impakammu ni Vigan City Health Officer Dr. Loida Ranches a ngumato pay dagiti positibo ti COVID19 ti siudad ti Vigan City.
Iti pannaki-uman ti Bombo Radyo Vigan kenni Dr. Ranches, iti panagado ti kaso ti nasao a virus ket resulta iti napalabas a gathering ti paskua, new year ken dagiti kinaado dagiti nagawid manipod kadagiti nadumaduma a paset ti pagilyan ken dagiti OFW.
Kadduan kadagiti kaso a nairekord ita ket mild cases ta fully vaccinated ken naka booster shot dagiti nagpositibo.
Innayon ti opisyal a dua pulo a porsiento kadagiti nagpositibo ti siudad ket dagiti ubbing agtawen sangapulo ket maysa agpababa nga awan bakunada pakairamanan dagiti maladaga.
Nagpalagip ni Ranches kadagiti umili nga agtalinaed iti panangsurot kadagiti protocol ken iti panagbakuna.
