Kinondenar ti Democrats lawmakers ti nagbalin a tignay ni US Pres. Donald Trump kontra iti Iran idi Sabado.
Segun ken ni Jack Reed a top Democrat iti Armed Services Committee, mapapati nga impan ni Trump iti pagilian iti nakaru a ranget kontra iti Iran nga awan ti nalawag a rason, pammalubos iti kongreso ken plano no kasano a leppasen ti riribok.
Kinunana nga agtaltalinaed a saan nga ammo dagiti Amerikano ti pudno a gastos, peggas ken kapaut iti rinnupak.
Kinontra pay ni Bernie Sanders ti administrasyon ket kinunana nga ilegal, planado ken mailabsing ti konstitusyon ti pagilian ken pinasingkedanna a loklokwen ti gobierno iti publiko iti pudno nga epekto ti riribok nga agresulta iti nayon pay a gulo.
Kabayatanna, inakusaran ni Ruben Gallego ni Trump a mangkonkontra iti kampaniana a kari a kissayan ti military interventions ken iruar dagiti dokumento maipanggep ken ni daydi Jeffrey Epstein.
