Imbilin ni Presidente Ferdinand Marcos Jr. ti Task Force El Niño a siguradwenda a nakalukat amin dagiti pampubliko nga ospital, adda kuryente ken umdas nga alikamen ken suplay iti panangtaming kadagiti sakit iti panawen ti tikag.
Dayta ket iti baet ti manamnama nga epekto ti super El Niño iti salun-at dagiti umili kas ti napasaran iti napalabas nga El Niño isu a nasken a masaganaan.
Segun ken ni Marcos, napateg a mabantayan ti salun-at ti publiko iti panawen ti tikag tapno masigurado ti kinatalged kabayatan a mapaspasaran ti epekto ti super El Niño.
Innayon ni Presidente a nasken a masigurado nga agan-andar dagiti generator kadagiti pampubliko nga ospital tapno agtultuloy ti operasion ken saan nga agbalin nga alanganin ti salun-at dagiti pasyente.
