VIGAN CITY – Im-imbestigaran pay laeng ti Burgos municipal police station iti pannaka-aksidente ti maysa a jeep idiay Barangay Lubing, Burgos tattay agsapa, a nagluganan dagiti pasahero a mapan kuma maki-tiyenda idiay ili ti Sta. Maria.
Maibasar iti inisyal nga impormasyon a naala ti Bombo Radyo Vigan ken ni Police Captain Daniel Burgos, hepe ti Burgos municipal police station, sumalog iti nasao a jeep a naggapu idiay Pilar, Abra idi adda ti nagovertake a motorsiklo ket napukaw ti driver iti kontrol iti manibela ti lugan.
Agsipud iti dayta, naidungpar ti lugan iti poon ti narra nga adda iti igid iti kalsada ket naipurwak dagiti pasahero, nangruna dagiti naglugan iti tuktok na wennu ti topload.
Nagsagaba iti minor injury iti naduma-duma a paset iti bagi da dagiti dua pulo a naglugan iti nasao a jeep, karaman iti driver ngem napakaroan dagiti agina a pasahero ta mapapati a natukkol iti ima da.
Naitaray idiay Ilocos Sur District Hospital – Narvacan dagiti biktima tapnu maagasan da.
