Inlawlawag ti Philippine National Police nga awan pakainaiganna iti eleksion ti pannakapapatay iti maysa nga election officer ken ti asawana idiay Datu Odin Sinsuat, Maguindanao del Norte.
Immunan a napag-atapan nga adda pakainaiganna iti eleksyon ti insidente, nangruna ta karaman iti area of concern ti Commission on Elections ti nasao a lugar.
Ngem iti naisayangkat nga inter agency command conference idi kalman, kinuna ni PNP Chief PGen. Francisco Marbil a personal a riri ti motibo iti krimen.
Kabayatanna, pinasingkedan ni Comelec Chairman George Erwin Garcia a dagiti kastoy nga insidente ti rason no apay a naannad ti komisyon iti panangideklarar ti Comelec control iti lugar.
Innayonna a saan a simple a desisyon daytoy ta dakkel ti adjustment a maidatag iti seguridad manipud iti Armed Forces of the Philippines ken ti Philippine National Police.
