VIGAN CITY – Agtultuloy ti imbestigasyon ti San Ildefonso Police Station iti napasamak a pammaltog idiay Barangay Gongogong, San Ildefonso.
Ti biktima ket ni Teresito Marquez Cabanilla, agtawen iti uppat a pulo ket dua, mannalon, tubo iti Tayum, Abra ngem agdama nga agnaed idiay Tay-ac, Bantay idinto a ti suspek ket saan pay a nasapulan.
Alas syete iti rabii idi nagiinomda kadua ti boss-na ta kalkalpasda a nag-ripper idin ta nagpakada ti biktima ngem saanna nga imbaga ti napananna agingga a nakaawat ti tawag ti boss-na a napaltugan ti biktima.
Imbutaktak ti biktima nga iti alas dyes iti rabii, bayat ti panagmanehona iti motorsiklo idiay diversion road ti nasao a barangay ket adda ti nangpaltog kenkuana iti likudan.
Iti pannaki-uman ti Bombo Radyo Vigan ken ni Police Captain Alberto Ramos Jr., awan met ti suspek a nakitada iti nasao a lugar kadagiti kinitada a CCTV footage ngem agtultuloy ti panangkitada pay ti sabali a footage tapno matakuatan ti pudno a napasamak.
Malaksid dayta, awan pay ti nasapulanda a basyo ti bala iti nakapasamakan ti krimen ngem yurayda ti pannakaidalan iti operasyon ti biktima ta no maala ti bala ket idalanda iti ballistic examination tapno matakuatan no ania a paltog ti naaramat.
Naduktalan pay a ti biktima ket napaltugan idi April 2022 ngem awan idi ti napilaan iti kaso.
