VIGAN CITY – Sumango iti kaso a Frustrated Murder ti suspek a ni Jay Ar Javier Santos, agtawen iti tallopulo ket maysa, gapu ti panangpaltog na iti biktima a kaanakanna a ni Jay Venancio Villanueva, agtawen iti limapulo, agkabbalay ken agpada nga agnaed iti Barangay San Pablo, Narvacan gapu iti mapapati a panangawag ti biktima iti suspek a “POGI” a nakasuronanna.
Iti pannaki-uman ti Bombo Radyo Vigan ken ni Police Captain Sonny Cabbat ti Narvacan Municipal Police Station, saanda pay laeng a nabirukan ti suspek, ngem basar iti CCTV footage nagturong daytoy idiay Barangay Dasay, Narvacan.
Maipalagip nga agdaldalus iti bangus ti biktima iti kusinada idin ta pinaltugan ti suspek nga adda iti likudanna ngem saan a pimmutok ti paltog iti umuna a gundaway a pananggandatna.
Nupay kasta, sinango ti biktima ti suspek ket nagsanud sa imputokna manen ti paltog a nakapuntaan ti akin-kannawan nga abaga ti biktima.
Naipaagas iti ospital ti biktima ken iti agdaman ket nasayaaten ti kasasaad na.
Kabayatanna, saan pay laeng maibaga dagiti otoridad no ania a klase a paltog ti nausar.
