VIGAN CITY – Agtultuloy ti panangala dagiti pannakabagi ti linteg iti Caoayan Municipal Police Station iti CCTV footages kadagiti dadduma a lugar tapno naal-alisto ti imbestigasyonda iti pammaltog a napasamak idiay Barangay Don Lorenzo Querubin, ili ti Caoayan.
Iti pannaki-uman ti Bombo Radyo Vigan ken ni Police Captain Jospeh Bantullay, awan pay ti lead-da kadagiti riding in tandem suspects iti pannakatay ni Jonjon Dayao a taga-Barangay Salindeg, Vigan ta saan a nakalukat ti CCTV nga asideg iti nakapasamakan ti krimen iti aldaw nga isu ti tiempo a pannakapaltog ti biktima gapu ta ti panagmalfunction na.
Makikamkammayet ti Caoayan Police Station kadagiti dadduma a police stations tapno makumpirmaran no ania dagiti kaso a nakairamramananna idi kallabes ta iti rekord ti Vigan City Police Station ket dati a drug surrenderree ti biktima.
Nakalugan iti van ti biktima a naggapu iti galyeraan idi pinaltugan dagiti riding in tandem a suspek ken adda naala iti nakapasamakan ti krimen ti adu a basyo ti caliber 45.
Dead on arrival ti biktima gapu iti tama ti bala iti ulo ken bakrangna.
