VIGAN CITY – Nagpatulong kadagiti nangatngato nga opisial iti Philippine National Police ken iti Philippine Army ni Pilar, Abra Vice Mayor Jaja Josefina Disono gapu iti mapapati a panang-ambush iti kapulisan iti convoy-na.
Iti ekslusibo a pannakipatpatang ti Bombo Radyo Vigan ken ni Vice Mayor Disono, agawid idin a naggapu iti session idin ta adda malabasanda a checkpoint ket idi nakalabes ti luganna, adda maysa nga armado a lalaki a nangpampag iti convoy-na ket pinilitda a paruaren dagiti kakaduana iti maysa a lugan.
Timmaray ti grupona idi makangngegdan ti agsasaruno a putok iti paltog manipud kadagiti mapapati a miembro ti PNP a nangiwayat iti checkpoint ken nanglapped iti luganda.
Natay ti maysa a kadua ni Disono a nagsagaba iti tama ti paltog iti ulona.
Innayon ti bise mayor a pinalikmutan dagiti pulis ita ti pagtaenganda.
Kabayatanna, dimmipensa met nga insigida ti PNP Cordillera inaig ti mapapati a panang-harass ti PNP Pilar, Abra iti convoy ti bise mayor.
Iti Facebook page post ti PNP PRO-COR, inyunay-unayda a nangiwayat iti checkpoint ti Pilar Municipal Police Station ken ti Regional Mobile Force Battalion 15 ket pinasardengda ti TOYOTA HI ACE.
Imbes nga agsardeng ti van iti checkpoint ket linabsada a nakaigapuan ti pannakadungparda kadagiti dua a personnel ti RMFB15.
Bayat ti yaadayo ti nakalugan iti HI ACE van ket nagpaputok iti paltog isu a napuntaan ti lugan ti pulis.
Naaddaan iti hot pursuit operation ken simrek iti compound ni Vice Mayor Disono ti puraw a van.
Nupay kasta, inkalintegan ti kapulisan nga awan ti harassment a napasamak no di ket daytoy ket lehitimo a hot-pursuit operation.
