VIGAN CITY – Mapapati nga imon ti rason iti panangpaltog ti driver ti kotse ti maysa a delivery rider itattay alas dos iti malem idiay Brgy. Bayubay Sur, San Vicente, Ilocos Sur.
Iti pannaki-uman iti Bombo Radyo Vigan ken ni PCapt. Michael Algo iti San Vicente Police Station, immuna a nagbato ti biktima a ni Paul Lendri Reyes Rosario, agtawen ti tallopulo, naasawaan nga agnaed idiay Brgy. San Pedro Sur, Vigan City isu a naglidem ti panagkita ken nakapungtot ti suspek a ni Julius Dela Cruz Roman, agtawen ti duapulo ket walo, naasawaan nga agnaed idiay Brgy. Bannuar, San Juan a gappuanan iti panangkamat ken panangpaltogna ken ni Rosario.
Nagsagaba iti dunor ni Rosario isu a naipan idiay Metro Vigan Cooperative Hospital, Bantay ket iti agdama natalgeden ti kasasaadna idinto a ti suspek a ni Roman ket insigida a simmuko kadagiti pannakabagi ti linteg karaman ti paltog nga inaramatna.
Naala iti nakapasamakan iti pammaltog ti pito a basyo iti bala ti paltog ket innayon ti hepe nga adda iti impresentar ti suspek a lisensya ti paltog ngem saan a nakaipakita iti permit to carry.
Nupay kasta ket kitkitaenen dagiti pannakabagi ti linteg nu adda iti susik idi kallabes ti suspek ken biktima.
