VIGAN CITY – Manarimaan pay laeng iti naun-uneg nga imbestigasyon dagiti otoridad iti napasamak a pammaltog idiay Bungro, Magsingal idi May 27 a nakatayan ti biktima a ni Rudy Palado nga agtawen iti lima pulo ket pito, naasawaan ken agnaed idiay Sta. Monica, Magsingal.
Maibasar iti imbestigasyon dagiti otoridad nga idaulwan ni Police Major Anthony Otinguey, hepe ti Magsingal municipal police station, sinaruno dagiti suspek ti biktima a naggapu iti amiyanan a direksyon ket idi nakadanun da iti nakapasamakan iti insidente, isun iti panangpaltog da kenkuana a nakatamaan iti ulo ken teltel na.
Uppat a kapsula iti caliber 45 a paltog iti naala iti nakapasamakan iti pammaltog nga isu ti mapapati nga inusar dagiti suspek.
Mainaig dayta, awan pay laeng iti maibaga dagiti kameng ti pamilya ti biktima a posible a motibo wennu rason iti pannakapapatay na ta itay kallabes ket awan met iti nakariri ti biktima.
